Ekuador

Toisan Korporazioarekin lankidetzan, lan handia egin da Cotacachi eskualdeko 10 ekimenak
indartzeko, kontuan harturik ekimen horietako gehienak emakumeek gidatzen dituztela. Lanaren fokua ekoizpen, merkataritza, enpresa eta antolaketa arloetan gaitasunak handitzean
jarri da. Parte hartze prozesu baten bidez, “Kutakachi” merkaturatze sarea ezartzea lortu da,
salmentak handitzeko eta merkatu zabalago batean sarearen irismena hedatzeko. Wiñak
kooperatibari etengabeko laguntza eskaini zaio gobernantza eta plangintza optimizatzen
jarraitzeko. Hala ere, erronkaz beteriko garaia izan da elkarte kitxua honentzat, guayusa landarea merkaturatzeko zailtasunak direla eta.

LANKIDETZA PROGRAMAREN TESTUINGURUA

2019an, Mundukide Ekuadorrera itzuli zen. Hain zuzen, Ekuadorreko iparraldeko mugan, batez ere Imbabura eta Carchi probintzietan, zer egin aztertu genuen, eta, ondoren, tokiko zer erakunde eta elkarterekin egingo genuen.

Mundukideren lanaren ardatza da gizartea eraldatzeko xedea duten nekazaritza- eta abeltzaintza-ekimenen antolakuntza-maila indartzea. Bestalde, diagnostiko- eta plangintza-prozesu bat ari gara koordinatzen Kichwa indigenen elkartearen Wiñak kooperatibarekin, horren antolamendu- eta enpresa-ahalmena indartu nahian.

Ekuadorrera itzuli ostean, lehen gertaera gogoangarria Mundukide-Laboral Kutxa Bidaia Solidarioa izan zen. 2019an egin zen, Alejandro Labaka Fundazioa toki-erakundearekin lankidetzan. Bidaia horretan, 11 euskal gaztek eta hiru ekuadortar indigenak Orellana probintziako kichwa eta waorani herrien bizipenak ezagutu zituzten hiru astez.

Bidaia solidario horri esker, gazteek bertatik bertara ikusi zituzten, batetik, natura- eta kultura-aberastasun paregabea edo «urre berdea» eta, bestetik, petrolio-ustiapenak eragindako kutsadura edo «urre beltza». Wiñak kooperatiba indigenaren esperientzia ere ezagutu zuten. Guayusa, bananak eta kakaoa merkaturatzen ditu, eta hasieran (2002-2006) Mundukidek babestu zuen.